03 Pargoäigi já pälkki

Merikoskâsâš pargoäigi lii laavâ mield enâmustáá 8 tijme peeivist já 40 tijmed ohhoost. Taan paijeel mannee pargo lii paijeelääigipargo. Pargoiähtusopâmušâst láá puáhtám sooppâđ uánihub pargoääigist. Tun koolgah finniđ pargovuáruluvâttâllâm ucemustáá oho ovdil liiston merkkejum vuossâmuu vuáru aalgâ. Ko listo lii almostittum, tom ij pyevti mutteđ innig oovtpiälálávt.

Jis tuu pargovuáru pištá paijeel 6 tiijme, tunjin kulá táválávt ucemustáá tijmepele kukkosâš purâdempuddâ. Purâdempuddâ puátá laavâst já lii pälhittes äigi, jis pargoiähtusopâmušâst ij lah soppum eresnáál. Tunjin pyehtih kuullâđ meiddei nk. kähvipuudah, moh kuleh pargoááigán. Toh láá távjá soppum pargoiähtusopâmušâin.

Jis pargovuáruh teivih oholoppáid tâi ehidáid, tain puátih táválávt laseh. Laahâ meerrid pasepeivisajanmáávsu já paijeelääigipargosajanmáávsuid, mutâ pargoiähtusopâmuš miäruštâl pälkkiaašijn stuárráámuu uási, tegu lávurdâhlase já ijjâpargolase. Täärhist pälkkirekinistmist, ete laseh láá maksum tunjin olmânáál.