05 Mäʹhtt reâuggkõskk poott leʹbe tõn loopptet?
Ǩiččlõddâmääiʹj kuäbbaž täättas vuäitt puʹrǧǧeed tuâjjsuåppmõõžž luõvâs ceäʹlǩǩemääiʹjtää. Tõn mâŋŋa nuʹtt tuâjjlaž ko še tuâjjuʹvddi âʹlǧǧe jääʹǩǩted luõvâs ceäʹlǩǩemääiʹj. Jõs suåppmõš lij mieʹrräiggsaž, tõn ij vueiʹt õõutpeällsânji ceäʹlǩǩed luõvâs.
Ǩiččlõddâmäiʹǧǧ vuäitt leeʹd jäänmõsân eeʹǩǩpieʹll leʹbe vuâlla eeʹjj piʹštti mieʹrräiggsaž reâuggkõõskâst jäänmõsân pieʹll reâuggkõõsk pešttmõõžžâst. Tuâjjmäinnsuåppmõõžžin leät vuäittam suåppâd še vuäʹnkab ǩiččlõddâmääiʹjest.
Tuâjjlaž ij taarbâž määin čåuddõõttmõʹšše, leâša tuâjjuʹvddjest feʹrttai leeʹd vuâđđ. Luõvâs ceälkkmõõžž mäinnan vuäitt leeʹd:
- tuâjjlast šõddi mäinn, mâʹte tuâjast ǩeeʹjjmieʹldd ääiʹj mâŋŋnummuš leʹbe hueʹneld reâuggmõš. Ouddâl luõvâs ceälkkmõõžž tuâjjuʹvddi âlgg väʹlddvuâkkõõzz mieʹldd uʹvdded tuâjjliʹžže vaartõõzz da vuäittmõõžž koʹrjjeed nääʹles.
- produuktlaž leʹbe tällõõzzlaž mäinn. Teʹl ouddmiârkkân põrggâz kaʹnntemvuõtt lij ǩeäppnam, ko ouddmiârkkân ouddsid leʹbe kääzzkõõzzid jeät vuåsttu da põrggâz teäʹǧǧvueʹǩǩ lij hueʹnn da jooudât staanõõttâd luõvâs ceälkkmõõžžid.
Muuʹšt, što tuʹst lij vuõiggâdvuõtt väʹldded tuärjjoummu mieʹldd, jõs tuâjjuʹvddi haaʹlad uʹvdded tuʹnne vaartõõzz leʹbe luõvâs ceäʹlǩǩemiʹlmmtõõzz. Tuärjjooumaž vuäitt leeʹd håʹt-i reâuggsuõjjlemåskkooumaž. Tuâj jie puuđ tâʹlles luõvâs ceälkkmõõžž leʹbe čåuddõõttmõõžž mâŋŋa, peʹce kuhttu vueʹjjest puätt vuõššân čåuddõõttâmäiʹǧǧ, koon ääiʹj reâuggmõš juätkkai takainalla.
Jõs pääʒʒak reâuǥteʹmmen, iʹlmmtõõđ tâʹlles reâuǥteʹmes reâuggooccjen dommkååddad reâuǥlažvuõttkääzzkõõzzid (tyomarkkinatori.fi). Vuäitak vuäǯǯad reâuǥteʹmesvuõtt-tuärjjõõzz tåʹlǩ ääiʹjest, kuäʹss leäk reâuggooccjen dommkååddad reâuǥlažvuõttkääzzkõõzzin.
Jõs čåuddõõđak jiõčč ââʹnteei määintää da pääʒʒak reâuǥteʹmmen, jiõk vuäǯǯ tâʹlles reâuǥteʹmesvuõttkoʹrvvõõzz, peʹce kareeʹns.