သင်၏ အခွင့်အရေးများနှင့် တာဝန်များကို သိပါ

သင်၏ အလုပ်ခန့်ထားမှုဆိုင်ရာ စည်းမျဉ်းစည်းကမ်းများဖြစ်သည့် သင်နှင့် သင့်အလုပ်ရှင်၏ အခွင့်အရေးများနှင့် တာဝန်များကို ဖင်လန်နိုင်ငံ၏ ဥပဒေနှင့် စုပေါင်းသဘောတူညီချက်များက ထိန်းချုပ်သည်။

ဖင်လန်နိုင်ငံတွင် နိုင်ငံခြားသား အလုပ်သမားများသည် ဖင်လန်နိုင်ငံသား အလုပ်သမားများနှင့် တူညီသော အခွင့်အရေးနှင့် တာဝန်များ ရှိကြသည်။

အသက်၊ တိုင်းရင်းသားဖြစ်မှု၊ နိုင်ငံသားဖြစ်မှု၊ ဘာသာစကား၊ ကိုးကွယ်သည့်ဘာသာ၊ ယုံကြည်ချက်များ၊ ထင်မြင်ချက်များ၊ နိုင်ငံရေး လှုပ်ရှားမှု၊ ကုန်သွယ်ရေး သမဂ္ဂ လှုပ်ရှားမှု၊ မိသားစု ဆွေမျိုးတော်စပ်မှုများ၊ ကျန်းမာရေး၊ မသန်စွမ်းဖြစ်မှု၊ လိင်ပိုင်းဆိုင်ရာ တိမ်းညွှတ်မှု သို့မဟုတ် အလုပ်သမား၏ ပုဂ္ဂိုလ်ရေးနှင့် ဆက်စပ်သော အခြားအကြောင်းခြင်းရာများပေါ်တွင် မူတည်၍ ခွဲခြားဆက်ဆံခွင့်မပြုပါ။

ဥပမာအားဖြင့် သင်သည် နိုင်ငံခြားသား အလုပ်သမား ဖြစ်သောကြောင့် သင့်လုပ်အားခကို လျှော့၍မရပါ။

ကျား/မ ဖြစ်တည်မှု၊ လိင်ပိုင်းဆိုင်ရာ ကိုယ်ပိုင်လက္ခဏာ သို့မဟုတ် လိင်ပိုင်းဆိုင်ရာ ဖော်ပြမှုပေါ် အခြေခံ၍ ခွဲခြားဆက်ဆံခြင်းကိုလည်း တားမြစ်ထားသည်။

စုပေါင်း သဘောတူညီချက်များ

အလုပ်ခန့်အပ်မှု၏ စည်းမျဉ်းစည်းကမ်းများဖြစ်သည့် အလုပ်သမားများနှင့် အလုပ်ရှင်များ၏ အခွင့်အရေးများနှင့် တာဝန်များကို စုပေါင်း သဘောတူညီချက်များပြုလုပ်၍ ကုန်သွယ်ရေးသမဂ္ဂများနှင့် အလုပ်ရှင်များဖက်ဒရေးရှင်းက ညှိနှိုင်းဆုံးဖြတ်သည်။ ဥပမာအားဖြင့် ၎င်းတို့တွင် လုပ်အားခ၊ အပိုဆုကြေးများ၊ အလုပ်ချိန်များ၊ အားလပ်ရက်များနှင့် လေ့ကျင့်မှု ရရှိရန် အခွင့်အရေးတို့ ပါဝင်သည်။

လုပ်ငန်းတိုင်းလိုလိုတွင် စုပေါင်းသဘောတူညီချက် ရှိသည်။ စုပေါင်းသဘောတူညီချက်များ ရှိသော လုပ်ငန်းများမှာ ဥပမာအားဖြင့် လက်လီလုပ်ငန်း၊ သန့်ရှင်းရေးနှင့် ဆောက်လုပ်ရေးလုပ်ငန်း စသည်တို့ ဖြစ်သည်။ သင့်လုပ်ငန်း၏ စုပေါင်းသဘောတူညီချက် မိတ္တူကို သင့်အလုပ်ရှင် သို့မဟုတ် ကုန်သွယ်ရေးသမဂ္ဂထံမှ တောင်းခံပါ။

စုပေါင်း သဘောတူညီချက်များသည် အလုပ်ခန့်အပ်စာချုပ်များနှင့် မတူညီပါ။

အလုပ်ခန့် အပ်စာချုပ်များ

သင်သည် အလုပ်ရှင်တစ်ဦးအတွက် စတင်အလုပ်လုပ်ချိန်တွင် စာဖြင့်ရေးထားသော အလုပ်ခန့်အပ် စာချုပ်ကို ထိုအလုပ်ရှင်နှင့် အမြဲတမ်း ချုပ်ဆိုပါ။ ပြဿနာ ပေါ်ပေါက်လာပါက သင် စတင်အလုပ်လုပ်ချိန်က မည်သည့်အရာကို သဘောတူညီခဲ့ကြောင်း စစ်ဆေးရန် ထိုစာချုပ်ကို အကိုးအကားပြုနိုင်သည်။

အလုပ်ခန့်အပ်စာချုပ်တွင် သင်သည် အချို့သောအလုပ်ကို လုပ်ရန် သဘောတူပြီး သင့်အလုပ်ရှင်က အချို့သော လျော်ကြေး ပေးချေရန်နှင့် အလုပ်ခန့်အပ်မှု စည်းမျဉ်းစည်းကမ်းများကို လိုက်နာရန် သဘောတူကြသည်။

သင်၏ အလုပ်ခန့်အပ်စာချုပ်ကို အမြဲတမ်း စာဖြင့်ရေးသားပြီး ချုပ်ဆိုပါ။ နှုတ်ဖြင့် သဘောတူညီချက်များသည်လည်း အကျုံးဝင်ပါသည်။ သို့သော် သင့်တွင် ပြဿနာ ရှိလာပါက စာဖြင့်ရေးသားထားသော စာချုပ်ရှိလျှင် သဘောတူညီထားသည့် အကြောင်းအရာကို သက်သေပြရန် ပိုလွယ်ကူသည်။ သင်သည် နှုတ်ဖြင့် သဘောတူညီချက် ပြုလုပ်သည့်တိုင်အောင် သင့်အလုပ်ရှင်က အလုပ်ခန့်အပ်မှု စည်းမျဉ်းစည်းကမ်းများကို စာဖြင့်ရေးသားပြီး သင့်အား ပေးရမည်။

အလုပ်ခန့်အပ်မှု စည်းမျဉ်းစည်းကမ်းများသည် အနည်းဆုံး စုပေါင်းသဘောတူညီချက်ပါ စည်းမျဉ်းစည်းကမ်းများအတိုင်း ကောင်းမွန်ရမည်။

သင်၏ အလုပ်ခန့်အပ်စာချုပ်တွင် အောက်ပါတို့ကို အမြဲတမ်း စစ်ဆေးပါ-

သင်၏ အလုပ်ခန့်စာချုပ်ကို လက်မှတ်မထိုးမီ ဂရုတစိုက် ဖတ်ပါ။ သင်နားမလည်သည့် အကြောင်းအရာကို လုံးဝ လက်မှတ်မထိုးပါနှင့်။

လုပ်ခမဲ့ လုပ်ငန်းခွင် လေ့ကျင့်ရေးဆင်းခြင်း

လုပ်ခမဲ့ လုပ်ငန်းခွင် လေ့ကျင့်ရေးဆင်းခြင်းကို တရားဝင် ပညာရေး အဖွဲ့အစည်း သို့မဟုတ် TE ဝန်ဆောင်မှုများ (ဖင်လန်နိုင်ငံ အလုပ်ခန့်အပ်ရေးရုံး) မှတစ်ဆင့် ကမ်းလှမ်းမှသာ တရားဝင်သည်။ အလုပ်ရှင်သည် သင့်တော်သော အလုပ်လျှောက်သူကို စမ်းသပ်လိုပါက အလုပ်ခန့်စာချုပ်တွင် အစမ်းခန့်ကာလကို ထည့်သွင်းနိုင်သည်။ အစမ်းခန့်ထားသော အလုပ်သမားများကိုလည်း လုပ်ခပေးရမည်။

သင့်တွင် အလုပ်မိတ်ဆက်သင်ကြားရန် အခွင့်အရေးရှိသည်

အလုပ်မိတ်ဆက်သင်ကြားခြင်းဆိုသည်မှာ သင့်အလုပ်နှင့် လုပ်ငန်းခွင် စည်းကမ်းများအကြောင်း သင့်အား သင်ကြားပေးခြင်း ဖြစ်သည်။ သင့်အား သင်၏ အလုပ်နှင့် လုပ်ငန်းခွင်၊ လုပ်ငန်းခွင်ဆိုင်ရာ ယေဘုယျ ညွှန်ကြားချက်များ၊ စက်ယန္တရားများနှင့် ကိရိယာများကို အသုံးပြုမှု၊ ဘေးကင်းစွာ အလုပ်လုပ်ရန် နည်းလမ်းများအပြင် သင့်အလုပ်၏ အန္တရာယ်များနှင့် ဘေးဥပဒ်များအကြောင်း အသိပေးရမည်။

နေမကောင်းသော အလုပ်သမားများသည် ပျက်ကွက်ခွင့် ရှိသည်

သင် နေမကောင်းဖြစ်ပါက သင်ပျက်ကွက်မည့်အကြောင်းကို သင့်အလုပ်ရှင်အား ချက်ချင်း အကြောင်းကြားပါ။ သင့်အလုပ်ရှင်က တောင်းဆိုပါက ဆရာဝန်လက်မှတ်ယူပြီး ထိုဆေးလက်မှတ်ကို သင့်အလုပ်ရှင်ထံ ပေးပို့ပါ။

သင့်အလုပ်ရှင်သည် သင်နေမကောင်းသည့်နေ့အတွက် လုပ်ခပေးရမည်။ သင့်ရောဂါသည် အချိန်ကြာပြီး သင့်အား အလုပ်မလုပ်နိုင်အောင် တားဆီးနေပါက သင့်တွင် နောက်ထပ် ကိုးရက်စာ လုပ်ခခံစားခွင့် ရှိသည်။ သင်သည် အနည်းဆုံး တစ်လ အလုပ်လုပ်ပြီးပါက လုပ်ခ အပြည့်အဝ ခံစားခွင့်ရှိသည်။ သင်သည် တစ်လအောက် အလုပ်လုပ်ပြီးပါက လုပ်ခတစ်ဝက် ခံစားခွင့်ရှိသည်။

ဆေးခွင့်နှင့် ပတ်သက်၍ သင့်လုပ်ငန်းတွင် အခြားပြဌာန်းချက်များ ရှိမရှိ သိရန် လုပ်ငန်း၏ စုပေါင်းသဘောတူညီချက်ကိုလည်း စစ်ဆေးပါ။ ယေဘုယျအားဖြင့် စုပေါင်းသဘောတူညီချက်ပါ စည်းမျဉ်းစည်းကမ်းများသည် ပိုကောင်းသောကြောင့် သင်သည် ရက်ပိုကြာကြာပျက်ပြီး လုပ်ခအပြည့်ရရှိနိုင်သည်။

အလုပ်အကိုင်ဆိုင်ရာ ကျန်းမာရေးစောင့်ရှောက်မှု

သင့်ကျန်းမာရေးနှင့် အလုပ်လုပ်နိုင်စွမ်းကို ကူညီစောင့်ရှောက်နိုင်ရန် အလုပ်ရှင်က အလုပ်အကိုင်ဆိုင်ရာ ကျန်းမာရေးစောင့်ရှောက်မှုကို စီစဉ်ပေးရမည်။ အလုပ်ရှင်အများအပြားသည် သူတို့၏ အလုပ်သမားများအတွက် ဆေးဘက်ဆိုင်ရာ ဝန်ဆောင်မှုများလည်း ကမ်းလှမ်းသည်။

အလုပ်ရှင်များသည် သင့်အား မတော်တဆထိခိုက်မှုများနှင့် အလုပ်အကိုင်ဆိုင်ရာ ရောဂါများအတွက် အာမခံ ထားပေးရန်လည်း တာဝန်ရှိသည်။ အာမခံသည် ဥပမာအားဖြင့် လုပ်ငန်းခွင်တွင် သို့မဟုတ် အလုပ်သွားအလုပ်ပြန်ချိန်အတွင်း သင် ကြုံတွေ့ခံစားခဲ့ရသော ထိခိုက်ဒဏ်ရာရမှုများအတွက် ကာကွယ်ပေးနိုင်ရာသည်။