02 Máŋga bargui laktáseaddji ášši vuođđuduvvá soahpamii
Máŋggat bargoeallima njuolggadusat leat sohppojuvvon juo ovddal gihtii ovdamearkka dihte lágas dahje bargoeaktosoahpamušas. Bargoaddi galgá čuovvut daid. Juos áššis lea muhtin eahpečielggasvuođaid, jeara bargoaddis, luohttámušolbmos dahje ámmátlihtus, leago du bargoaddi geatnegas čuovvut muhtin suorggi soahpamuša ja mo ášši manná dan mielde. Sullii 80 % bargiin gullet muhtin bargoeaktosoahpamuša vuollái.
Láhka (laki) addá dábálaččat vuolimus dási, man buot bargoaddit galget čuovvut.
Bargoeaktosoahpamuš (työehtosopimus) guoská dihto suorggi bargoaddiide. Doppe boahtá ovdamearkka dihte unnimusbálká ja máŋgga áššis lea sohppojuvvon bargi geahččanguovllus buorebut go lágas. Bargoeaktosoahpamuš lea ámmátlihtu ja bargoaddelihtu gaskasaš ráđđádallanboađus.
Bargosoahpamuš (työsopimus) lea du ja du bargoaddi gaskasaš soahpamuš das, mainna eavttuiguin ja mo don barggat, muhto dan unnimuseavttut mearrašuvvet lága ja bargoeaktosoahpamušaid mielde. Sáhtát álot soahpat buorebut go maid láhka ja bargoeaktosoahpamuš meroštallet, muhto heajubut ii sáhte soahpat.
Luohttámušolmmoš diehtá ja dovdá bargoeaktosoahpamuša mearrádusaid ja máhttá veahkehit du vejolaš čuolbmadiliin. Lihtu lahttun sáhtát álot jearrat ráđi luohttámušolbmos.