04 Pyeccen ferttee vuoiŋâstiđ
Pyeccen porgâm lii varâlâš tunjin, pargoskipáráid já pargotorvolâšvuotân, nuuvt ete ele moonâ pyeccen paargon.
Ko moonah uđđâ pargosajan, čielgâd, maht ovdâolmooš haalijd ete tun almottah tast jis puáccááh. Čielgâd meiddei, maggaar pargotiervâsvuođâhuolâttâs tuu pargosaajeest lii. Jyehi pargest lii vuoigâdvuotâ pargotiervâsvuotân.
Puoccâmääigi pargotiijmijd ij taarbâš porgâđ maŋa. Tust lii vuoigâdvuotâ uážžuđ päälhi puáccámpeeivi čuávvoo oovce argâpeeivist. Jis tun lah lamaš pargoost ucemustáá mánuppaje, uážuh oles päälhi. Jis tun lah lamaš pargoost vuálá mánuppaje, uážuh pele táválii pälhistâd. Táválávt pargoiähtusopâmušâst lii soppum pyerebeht. Talle tun uážuh tievâs päälhi eenâb ko oovce peeivist. Jis tun lah pyeccen paijeel 10 peivid, Kela máksá tunjin puoccâmpeiviruuđâ.