02 သင့်အခွင့်အရေးများနှင့် တာဝန်များကို သိထားပါ
သင်၏ အလုပ်ခန့်ထားမှုဆိုင်ရာ စည်းမျဉ်းစည်းကမ်းများဖြစ်သည့် သင်နှင့် သင့်အလုပ်ရှင်၏ အခွင့်အရေးများနှင့် တာဝန်များကို ဖင်လန်နိုင်ငံ၏ ဥပဒေနှင့် စုပေါင်းသဘောတူညီချက်များက ထိန်းချုပ်သည်။
ဖင်လန်နိုင်ငံတွင် နိုင်ငံခြားသား အလုပ်သမားများသည် ဖင်လန်နိုင်ငံသား အလုပ်သမားများနှင့် တန်းတူညီသော အခွင့်အရေးနှင့် တာဝန်များ ရှိကြသည်။
အသက်၊ တိုင်းရင်းသားဖြစ်မှု၊ နိုင်ငံသားဖြစ်မှု၊ ဘာသာစကား၊ ကိုးကွယ်သည့်ဘာသာ၊ ယုံကြည်ချက်များ၊ ထင်မြင်ချက်များ၊ နိုင်ငံရေး လှုပ်ရှားမှု၊ ကုန်သွယ်ရေး သမဂ္ဂ လှုပ်ရှားမှု၊ မိသားစု ဆွေမျိုးတော်စပ်မှုများ၊ ကျန်းမာရေး၊ မသန်စွမ်းဖြစ်မှု၊ လိင်ပိုင်းဆိုင်ရာ တိမ်းညွှတ်မှု သို့မဟုတ် အလုပ်သမား၏ ပုဂ္ဂိုလ်ရေးနှင့် ဆက်စပ်သော အခြားအကြောင်းခြင်းရာများပေါ်တွင် မူတည်၍ ခွဲခြားဆက်ဆံခွင့်မပြုပါ။ ဖင်လန်နိုင်ငံတွင် ကျား/မ ဖြစ်တည်မှု၊ လိင်ပိုင်းဆိုင်ရာ ကိုယ်ပိုင်လက္ခဏာ သို့မဟုတ် လိင်ပိုင်းဆိုင်ရာ ဖော်ပြမှုပေါ် အခြေခံ၍ ခွဲခြားဆက်ဆံခြင်းကိုလည်း တားမြစ်ထားသည်။
ဥပမာအားဖြင့် သင်က နိုင်ငံခြားသား အလုပ်သမား ဖြစ်သောကြောင့် သင့်လုပ်အားခ လျှော့ချခံရခြင်း မဖြစ်ရပါ။
စုပေါင်း သဘောတူညီချက်များ
စုပေါင်း သဘောတူညီချက်တစ်ခု (ဖင်လန်ဘာသာစကားဖြင့် “työehtosopimus”၊ “TES” အဖြစ် အတိုကောက်ဖော်ပြလေ့ရှိသည်) သည် အလုပ်ရှင်များနှင့် ဝန်ထမ်းများ၏ အခွင့်အရေးများနှင့် တာဝန်များနှင့် စပ်လျဉ်း၍ အလုပ်သမားများကို ကိုယ်စားပြုသော အလုပ်သမားသမဂ္ဂနှင့် အလုပ်ရှင်များ၏ အသင်းအဖွဲ့တို့က ညှိနှိုင်းဆောင်ရွက်ကြသည့် သဘောတူညီချက်တစ်ရပ်၊ ဆိုလိုသည်မှာ၊ ကဏ္ဍအတွင်းရှိ အလုပ်အကိုင်၏ စည်းကမ်းသတ်မှတ်ချက်များ ဖြစ်သည်။ ၎င်းတို့တွင် လုပ်အားခ၊ လစာဖြည့်စွက်ချက်များနှင့် အလုပ်လုပ်ချိန်များ ပါဝင်သော်လည်း ၎င်းတို့ချည်းသာဟု ကန့်သတ်မထားပါ။
လုပ်ငန်းနယ်ပယ်တိုင်းလိုလိုတွင် စုပေါင်းသဘောတူညီချက် ရှိသည်။ ဥပမာ၊ လက်လီ၊ သန့်ရှင်းရေး၊ တည်းခိုရေးနှင့် အစားအသောက်ဝန်ဆောင်မှု၊ လယ်ယာစိုက်ပျိုးရေးနှင့် ဆောက်လုပ်ရေးလုပ်ငန်းနယ်ပယ်များတွင် ကိုယ်ပိုင် စုပေါင်းသဘောတူညီချက်များ ရှိသည်။ သင့်လုပ်ငန်းနယ်ပယ်၏ စုပေါင်းသဘောတူညီချက် မိတ္တူကို သင့်အလုပ်ရှင် သို့မဟုတ် အလုပ်သမားသမဂ္ဂထံမှ တောင်းခံပါ။
သင့်လုပ်ငန်းကဏ္ဍ၏ စုပေါင်း သဘောတူညီချက်ကို ဖင်လန်နိုင်ငံ အလုပ်သမားသမဂ္ဂ မဟာမိတ်အဖွဲ့ (Finnish Trade Union Confederation, SAK) ၏ အွန်လိုင်းဝန်ဆောင်မှု (ဖင်လန်၊ ဆွီဒင်နှင့် အင်္ဂလိပ် ဘာသာစကားများဖြင့်) မှတစ်ဆင့်လည်း ရှာဖွေနိုင်သည်- သင့်ကဏ္ဍအတွက် အလုပ်သမားသမဂ္ဂ၏ မိတ်ဆက်စာမျက်နှာကို နှိပ်ခြင်းဖြင့် စတင်ပါ (Get to know the union)။ စာမျက်နှာအောက်ခြေတွင် အလုပ်သမားသမဂ္ဂက ညှိနှိုင်းထားသော စုပေါင်းသဘောတူညီချက်များသို့ လင့်ခ်တစ်ခုကို သင် မြင်တွေ့ရပါမည်။
စုပေါင်းသဘောတူညီချက်များသည် အလုပ်ခွင်တွင်း ကိစ္စရပ်အချို့ကို အလုပ်ခွင်၌ပင် သဘောတူညီပေးရန် ခွင့်ပြုပေးနိုင်ပါသည်။ အလုပ်ခွင်တွင်း သဘောတူညီချက်များကို ကြီးကြပ်အုပ်ချုပ်သူ သို့မဟုတ် အခြား အလုပ်သမား ကိုယ်စားလှယ်နှင့် အလုပ်ရှင်တို့အကြား အမြဲ ချုပ်ဆိုရပါသည်။ လုပ်ငန်းဆိုင်ရာ သဘောတူညီချက် လုပ်ငန်းစဉ်ကို သင့်လုပ်ငန်းနယ်ပယ်၏ စုပေါင်းသဘောတူညီချက်တွင် စစ်ဆေးကြည့်ပါ။
စုပေါင်း သဘောတူညီချက်များသည် အလုပ်ခန့်အပ်စာချုပ်များနှင့် မတူညီပါ။
အလုပ်ခန့် အပ်စာချုပ်များ
သင် အလုပ်အသစ်တစ်ခု စတင်သည့်အခါ စာချုပ်စာတမ်းကို သင့် အလုပ်ရှင်နှင့်အတူ သေချာ ရေးထိုး၍ချုပ်ဆိုရပါသည်။ ပြဿနာ ပေါ်ပေါက်လာပါက သင် စတင်အလုပ်လုပ်ချိန်က မည်သည့်အရာကို သဘောတူညီခဲ့ကြောင်း စစ်ဆေးရန် ထိုစာချုပ်ကို အကိုးအကားပြုနိုင်သည်။
အလုပ်ခန့်အပ်စာချုပ်တွင် သင်သည် အချို့သောအလုပ်ကို လုပ်ရန် သဘောတူပြီး သင့်အလုပ်ရှင်က အချို့သော လျော်ကြေး ပေးချေရန်နှင့် အလုပ်ခန့်အပ်မှု စည်းမျဉ်းစည်းကမ်းများကို လိုက်နာရန် သဘောတူကြသည်။
သင်၏ အလုပ်ခန့်အပ်စာချုပ်ကို အမြဲတမ်း စာဖြင့်ရေးသားပြီး ချုပ်ဆိုရပါမည်။ နှုတ်ဖြင့် သဘောတူညီချက်များသည်လည်း အကျုံးဝင်ပါသည်။ သို့သော် သင့်တွင် ပြဿနာ ရှိလာပါက စာဖြင့်ရေးသားထားသော စာချုပ်ရှိလျှင် သဘောတူညီထားသည့် အကြောင်းအရာကို သက်သေပြရန် ပိုလွယ်ကူသည်။ သင်သည် နှုတ်ဖြင့် သဘောတူညီချက် ပြုလုပ်သည့်တိုင်အောင် သင့်အလုပ်ရှင်က အလုပ်ခန့်အပ်မှု စည်းမျဉ်းစည်းကမ်းများကို စာဖြင့်ရေးသားပြီး သင့်အား ပေးရမည်။
အလုပ်ခန့်အပ်မှု စည်းမျဉ်းစည်းကမ်းများသည် အနည်းဆုံး စုပေါင်းသဘောတူညီချက်ပါ စည်းမျဉ်းစည်းကမ်းများအတိုင်း ကောင်းမွန်ရမည်။
သင်၏ အလုပ်ခန့်အပ်စာချုပ်တွင် အောက်ပါတို့ကို အမြဲတမ်း စစ်ဆေးပါ-
- အလုပ်ရှင်၏ အမည်။
- အလုပ်သမား၏အမည်၊ ဆိုလိုသည်မှာ သင့်အမည်။
- အလုပ်စတင်သည့်ရက်စွဲ။
- အစမ်းခန့်ကာလ ရှိပါသလား။ ထိုကာလသည် မည်မျှကြာသနည်း။
- အစမ်းခန့်ကာလ၏ ရည်ရွယ်ချက်သည် အလုပ်အကိုင်စာချုပ်ကို ဆက်လက်၍ ချုပ်ဆိုရန်၊ မချုပ်ဆိုရန် ထည့်သွင်းစဉ်းစားဖို့ သင်နှင့် သင့်အလုပ်ရှင်အား အချိန်ပေးရန် ဖြစ်ပါသည်။ ၎င်းသည် များသောအားဖြင့် အများဆုံး ခြောက်လ ကြာတတ်သည်။ အစမ်းခန့်ကာလအတွင်း အလုပ်သမား သို့မဟုတ် အလုပ်ရှင်သည် အသိပေးကာလမလိုဘဲ အလုပ်အကိုင် စာချုပ်ကို ဖျက်သိမ်းနိုင်သည်။
- အလုပ်အကိုင် ကာလ-
- သင့်အလုပ်သည် အမြဲတမ်း (အဆုံးမရှိ၊ ဆက်တိုက်) သို့မဟုတ် ယာယီ (သတ်မှတ်ကာလ) အလုပ် ဖြစ်ပါသလား။
- ယာယီစာချုပ်များသည် ယာယီ သဘောတရားအတွက် အကြောင်းရင်းကို ဖော်ပြရမည်။ သို့သော် ဖင်လန်အစိုးရသည် ခိုင်လုံသော အကြောင်းပြချက် မလိုဘဲ အများဆုံး တစ်နှစ်တာအထိ အလုပ်အကိုင် စာချုပ်များ ချုပ်ဆိုခွင့်ပြုသည့် အဆိုပြုချက်ကို ပြင်ဆင်ရေးဆွဲနေပါသည်။ ၎င်းသည် 2026 အစောပိုင်းတွင် စတင်သက်ဝင်လာနိုင်ပါသည်။
- သတ်မှတ်ကာလအလိုက် အလုပ်အကိုင်စာချုပ်၏ အဆုံးသတ်ရက်စွဲ သို့မဟုတ် ခန့်မှန်း အဆုံးသတ်ရက်စွဲ။
- ဘယ်နေရာမှာ အလုပ်လုပ်ရမလဲ။
- သင့်တာဝန်တွေက ဘာတွေလဲ။
- သင့်အလုပ်အတွက် သင့်အား ငွေ ဘယ်လောက်ပေးမှာလဲ။
- အနည်းဆုံးလုပ်ခကို စုပေါင်း သဘောတူညီချက်ဖြင့် ဆုံးဖြတ်သည်။ ဖင်လန်နိုင်ငံတွင် အနည်းဆုံးလုပ်ခအတွက် ဥပဒေပြဋ္ဌာန်းမထားပါ။
- သင့်လုပ်အားခများကို ပေးဆောင်ခဲ့သော ရက်စွဲ။
- သင်အလုပ်လုပ်မည့် အလုပ်ချိန်များ သို့မဟုတ် အလုပ်ချိန်နာရီများ။
- ဖင်လန်နိုင်ငံတွင် အချိန်ပြည့်အလုပ်သည် များသောအားဖြင့် တစ်ပတ်လျှင် 5 ရက်အလုပ်လုပ်ပြီး တစ်နေ့လျှင် 8 နာရီထက်မပိုဘဲ အလုပ်လုပ်ခြင်း ဖြစ်သည်။
- သင်သည် အလုပ်ဆိုင်းဖြင့် အလုပ်လုပ်ပါက သင်၏ အလုပ်ချိန်နာရီများ အမျိုးမျိုး ကွဲပြားနေပါမည်။ သို့သော်လည်း ၎င်းတို့သည် လုပ်ငန်းကဏ္ဍ၏ စုပေါင်းသဘောတူညီချက်ကို လိုက်နာရပါမည်။
- ဖင်လန်နိုင်ငံတွင် အချိန်ပိုအလုပ်လုပ်ခြင်းနှင့် တနင်္ဂနွေနေ့များတွင် အလုပ်ဆင်းခြင်းအတွက် ထပ်ဆောင်း နစ်နာကြေးပေးချေရန် ဥပဒေအရ လိုအပ်သည်။ ညနေခင်းများနှင့် စနေ၊ တနင်္ဂနွေတွင် အလုပ်လုပ်ခြင်းအတွက် နစ်နာကြေးပေးခြင်းအား မကြာခဏဆိုသလို စုပေါင်း သဘောတူညီချက်တွင် ထည့်သွင်းထားပါသည်။
- သင်သည် အချိန်ပိုင်းစာချုပ် ချုပ်ဆိုမည်ဆိုပါက လုံလောက်သော လုပ်အားခ ရရှိရန်အတွက် အလုပ်ချိန်လုံလောက်ကြောင်း သေချာပါစေ။ အနည်းဆုံး အလုပ်ချိန် အရေအတွက်သည် သင့်အလုပ်စာချုပ်တွင် ကတိပြုထားသည့် အနည်းဆုံး နာရီအရေအတွက်ကို သင်ရရှိမည်ဟု ဆိုလိုသည်။
- ဥပမာ၊ သင့်အလုပ်စာချုပ်တွင် တစ်ပတ်လျှင် နာရီ 0-20 နာရီဟု ဖော်ပြထားပါက အချို့ရက်သတ္တပတ်များအတွင်း မည်သည့် အလုပ် သို့မဟုတ် လုပ်အားခကိုမျှ သင်ရရှိမည်မဟုတ်ပါ။
- အလုပ်ရှင်၏ အဆိုပြုချက်အတိုင်း မတူကွဲပြားသော အလုပ်ချိန်များ (ဥပမာ၊ တစ်ပတ်လျှင် 10-30 နာရီ) ကို သင် သဘောတူလိုက်ပါက အလုပ်ရှင်သည် သင်၏ အလုပ်ချိန်များက လက်တွေ့တွင် မည်သို့ကွဲပြားမည်ဆိုသည့်အချက်၏ ရှင်းလင်းချက်ကို သင့်အား ဖော်ပြပေးရပါမည်။
- သင်အလုပ်လုပ်ခဲ့သော အချိန်နှင့် ကြာချိန်တို့ကို အမြဲချရေးပေးပါ။ သင့်အား မှန်ကန်စွာ ငွေပေးချေကြောင်း သေချာအောင် သင့်မှတ်စုများကို စစ်ဆေးနိုင်သည်။ ၎င်းသည် အငြင်းပွားစရာများ ဖြစ်ပေါ်လာပါကလည်း အထောက်အကူပြုသည်။
- နှစ်ပတ်လည်ခွင့် သတ်မှတ်ခြင်း–
- သင်သည် တစ်လလျှင် အနည်းဆုံး 35 နာရီ သို့မဟုတ် 14 ရက်အလုပ်လုပ်သည့်အခါ နှစ်ပတ်လည်ခွင့် ရရှိပါသည်။
- သင်သည် တစ်နှစ်အောက် အလုပ်လုပ်လာခဲ့ပြီးဖြစ်ပါက လစဉ် ခွင့်နှစ်ရက် ရရှိပါသည်။
- တစ်နှစ်ကျော် အလုပ်လုပ်ပြီးတဲ့နောက် လတိုင်း ခွင့် 2.5 ရက် ရရှိပါသည်။
- ကြိုတင်အသိပေးကာလ-
- ကြိုတင်အသိပေးကာလဆိုသည်မှာ သင်၏ အလုပ်ခန့်စာချုပ်ကို သင် သို့မဟုတ် သင့်အလုပ်ရှင်မှ ရပ်စဲပြီးနောက် သင် အလုပ်လုပ်ရမည့် ကြာချိန်ဖြစ်သည်။
- အလုပ်ရှင်တစ်ဦးထံတွင် သင့်အလုပ်ကို အဆုံးသတ်ရန် ခိုင်လုံသော အကြောင်းပြချက်တစ်ခု အမြဲရှိရမည်။
- အလုပ်ရှင်များသည် ပုံသေကာလ သတ်မှတ်ထားသည့် အလုပ်ခန့်စာချုပ်များ အကျုံးဝင်နေသေးသရွေ့ ၎င်းတို့ကို ရပ်စဲခွင့်မရှိပါ။
- အလုပ်သမားများသည် ပုံသေကာလ သတ်မှတ်ထားသော အလုပ်ခန့်စာချုပ် သက်တမ်းမကုန်မီ နှုတ်ထွက်၍ မရသော်လည်း သူတို့သည် ထိုကိစ္စရပ်ကို အလုပ်ရှင်နှင့် မကြာခဏ ဆွေးနွေးညှိနှိုင်းနိုင်သည်။
- သင့်အလုပ်အတွက် စုပေါင်းသဘောတူညီချက်ဆိုတာ ဘာလဲ။
သင်၏ အလုပ်ခန့်စာချုပ်ကို လက်မှတ်မထိုးမီ ဂရုတစိုက် ဖတ်ပါ။ သင်နားမလည်သည့် အကြောင်းအရာကို လုံးဝ လက်မှတ်မထိုးပါနှင့်။
သင်က အလုပ်သမား သို့မဟုတ် ကိုယ်ပိုင်အလုပ်လုပ်သူ ဟုတ်၊ မဟုတ် စစ်ဆေးပါ
တကယ့်အလုပ်စာချုပ် (ဖင်လန်ဘာသာစကားဖြင့် “työsopimus”) ကို လက်မှတ်ရေးထိုးနေကြောင်း သေချာစေရန် သင့်အလုပ်ရှင်နှင့် အမြဲ စုံစမ်းမေးမြန်းပါ။ သင့်အလုပ်ရှင်က သင့်အား ကိုယ်ပိုင်အလုပ်လုပ်သူတစ်ဦးအဖြစ် အလုပ်လုပ်ရန် ကမ်းလှမ်းမည်ဆိုပါက သင်အလုပ်လုပ်နေသော ကုမ္ပဏီနှင့် အလုပ်အကိုင် ဆက်ဆံရေး သင့်တွင် မရှိပါ။ ဤကိစ္စတွင် အလုပ်အကိုင် စာချုပ်အစား စာချုပ်ကို “ကော်မရှင်သဘောတူညီချက်” (ဖင်လန်ဘာသာစကားဖြင့် “toimeksiantosopimus”) ဟု ခေါ်ဆိုနိုင်သည်။
ကိုယ်ပိုင်အလုပ်လုပ်သူတစ်ဦးအနေဖြင့် သင့်အား ဖင်လန်နိုင်ငံ၏ အလုပ်လုပ်ချိန်နှင့် အလုပ်ခွင်ကျန်းမာရေးနှင့် ဘေးကင်းရေးဥပဒေများက ကာကွယ်ပေးခြင်းမရှိသည့်အပြင် သင်သည် အလုပ်အကိုင်ဆိုင်ရာ ကျန်းမာရေးစောင့်ရှောက်မှုကိုလည်း ရပိုင်ခွင့်မရှိပါ။ ထို့အပြင် သင်သည် ကိုယ်ပိုင်အလုပ်လုပ်သူဖြစ်ပါက အလုပ်ရှင်တစ်ဦးသည် တရားဝင် အလုပ်မတော်တဆမှုနှင့် အလုပ်ခွင်ရောဂါအာမခံကို သင့်အား ပေးမည်မဟုတ်ပါ။ ယင်းအစား သင့်အာမခံကို သင်ကိုယ်တိုင် စီစဉ်ရမည်။
သင့်အလုပ်သည် အလုပ်အကိုင်ဆက်ဆံရေး၏ လက္ခဏာများနှင့် ကိုက်ညီပါက၊ ဥပမာ၊ သင်သည် ကော်မရှင်သဘောတူစာချုပ်ကို လက်မှတ်ရေးထိုးထားလျှင်ပင် ၎င်းအား ဖင်လန်ဥပဒေအရ အလုပ်အကိုင်ဆက်ဆံရေးအဖြစ် သတ်မှတ်သည်။
လစာစာရွက်
လုပ်အားခကို ဘဏ်အကောင့်ထဲသို့ ထည့်ပေးရမည်။ လုပ်အားခကို ခိုင်လုံသောအကြောင်းပြချက်တစ်ခုဖြင့်သာ ငွေသားဖြင့် ပေးနိုင်ပါသည်။ ထိုသို့သော အကြောင်းရင်းတစ်ခုမှာ အလုပ်သမားတွင် ဘဏ်အကောင့် မရှိခြင်းဖြစ်နိုင်သည်။ ဘဏ်အကောင့်များမှာ ကိုယ်ရေးကိုယ်တာ ဖြစ်သည်။
သင် အကောင့်ဖွင့်သည့်အခါ နိုင်ငံကူးလက်မှတ် သို့မဟုတ် အခြားတရားဝင်အထောက်အထားစာရွက်စာတမ်း လိုအပ်သည်။ သင့်တွင် ဖင်လန်နိုင်ငံ အထောက်အထားကုဒ်တစ်ခု ရှိမည်ဆိုပါက အကောင့်ဖွင့်ရန် ပိုလွယ်ကူပါသည်။ ဒစ်ဂျစ်တယ်နှင့် လူဦးရေ ဒေတာ ဝန်ဆောင်မှုများ အေဂျင်စီထံမှ ကိုယ်ပိုင်အထောက်အထားကုဒ်တစ်ခုကို သင် လျှောက်ထားနိုင်ပါသည်။ ကိုယ်ပိုင်အထောက်အထားအတွက် လျှောက်ထားခြင်းနှင့်ပတ်သက်သော နောက်ထပ်အသေးစိတ်ညွှန်ကြားချက်များအတွက် ဒစ်ဂျစ်တယ်နှင့် လူဦးရေ ဒေတာဝန်ဆောင်မှု အေဂျင်စီ၏ ဝက်ဘ်ဆိုက် (ဖင်လန်၊ ဆွီဒင်နှင့် အင်္ဂလိပ်ဘာသာစကားဖြင့်) ကို ကြည့်ပါ။ ဘဏ်အကောင့်ဖွင့်ရန် အခြားမည်သည့်စာရွက်စာတမ်းများလိုအပ်မည်ကို သိနိုင်ရန် သင့်ဘဏ်အား မေးမြန်းပါ။
လစာရသည့်အခါ လစာစာရွက်ကိုလည်း အမြဲ လက်ခံရရှိရပါမည်။ လစာစာရင်းသည် သင့်အား ပေးဆောင်ထားသည့် ငွေပမာဏ၊ သင်၏စုစုပေါင်းလစာမှ နုတ်ဖြတ်ငွေများအပြင် သင့်အကောင့်ထဲသို့ ထည့်ပေးမည့်ငွေပမာဏ၊ ဆိုလိုသည်မှာ အသားတင်လစာတို့ကို အသေးစိတ်ဖော်ပြပေးပါသည်။
လစာ လက်ခံရရှိချိန်တိုင်းတွင် အခွန်အခများနှင့် အခြား ပြဋ္ဌာန်းဥပဒေအရ ပေးငွေများကို သင် ပေးဆောင်ရပါသည်။ ၎င်းသည် သင့်အကောင့်အတွင်း သင်လက်ခံရရှိထားသော ငွေပမာဏသည် သင်၏ အလုပ်အကိုင်စာချုပ်တွင် သဘောတူထားသည့် လုပ်အားခ ပမာဏ အပြည့်တော့ မဟုတ်နိုင်ဟု ဆိုလိုပါသည်။
သင့်လစာစာရွက်ကို အမြဲဂရုတစိုက် စစ်ဆေးပါ။ လစာစာရွက် ဝေါဟာရများ၏ ဘာသာပြန်ချက်များကို ရုပ်ပုံအောက်တွင် တွေ့ရှိနိုင်ပါသည်။
ဖင်လန်နိုင်ငံရှိ စံနမူနာ လစာစာရွက်
လစာစာရွက်ပါ အချက်အလက်များအတွက် ဘာသာပြန်ဆိုချက်များ
Maksupäivä
ငွေပေးချေမှု ရက်စွဲ
Henkilötunnus
ကိုယ်ပိုင်အထောက်အထားကုဒ်
Maksetaan tilille
အကောင့်သို့ ပေးထားသည်
Käytettävissä olevat lomapäivät
ရရှိနိုင်သော ခွင့်ရက်များ
Verokorttitiedot
အခွန်ကတ် သတင်းအချက်အလက်
Veroprosentti
အခွန်နှုန်းထား
Lisäprosentti
အပိုဆောင်း နုတ်ယူငွေများ
Palkkakausi
လစာပေး ကာလ
Ammattinimike
အလုပ်ရာထူး
Työsuhteen aloituspäivä
အလုပ်အကိုင် စတင်သည့်ရက်စွဲ
Uusi lomapäivien kertymä
ခွင့်ရက်မများ အသစ်တိုးပွားလာခြင်း
Määrä
ပမာဏ
Yksikköhinta
တစ်ခုချင်း ဈေးနှုန်း
Palkkajaksolla
လစာပေးကာလအတွင်း
Vuoden alusta
တစ်နှစ်တာ၏ အစမှစ၍
€/t (euroa per tunti)
€/t (တစ်နာရီလျှင် ယူရိုငွေများ)
Rahapalkka
ငွေသား လစာ
Bruttopalkka
စုစုပေါင်း လစာ
Lauantailisä
စနေနေ့ ထောက်ပံ့ကြေး
Sunnuntailisä
တနင်္ဂနွေနေ့ ထောက်ပံ့ကြေး
Lisät yhteensä
စုစုပေါင်း ထောက်ပံ့ကြေးများ
Bruttopalkka yhteensä
စုစုပေါင်း အသားတင်လစာ
Ennakonpidätys (sis. sairausvakuutusmaksun)
ထိမ်ချန်အခွန်ငွေ (ကျန်းမာရေးအာမခံ ထည့်ဝင်ငွေ အပါအဝင်)
Työeläkemaksu
ဝင်ငွေနှင့် ဆက်စပ်သော ပင်စင် ထည့်ဝင်ငွေ
Työttömyysvakuutusmaksu
အလုပ်လက်မဲ့ အာမခံ ထည့်ဝင်ငွေ
Vähennykset yhteensä
စုစုပေါင်း နုတ်ဖြတ်ငွေများ
Nettopalkka
အသားတင်လစာ
Ay-jäsenmaksu
အလုပ်သမားသမဂ္ဂ အဖွဲ့ဝင်ကြေး
Maksetaan
ပေးဆောင်ရမည်
လုပ်ခမဲ့ လုပ်ငန်းခွင် လေ့ကျင့်ရေးဆင်းခြင်း
လုပ်ခမဲ့ လုပ်ငန်းခွင် လေ့ကျင့်ရေးဆင်းခြင်းသည် နေရာချထားခြင်းကို တရားဝင် ပညာရေးအဖွဲ့အစည်း သို့မဟုတ် အစိုးရအလုပ်အကိုင် ဝန်ဆောင်မှုများမှတစ်ဆင့် ကမ်းလှမ်းပေးချိန်တွင်သာ တရားဝင်ပါသည်။ အလုပ်ရှင်သည် သင့်တော်သော အလုပ်လျှောက်သူကို စမ်းသပ်လိုပါက အလုပ်ခန့်စာချုပ်တွင် အစမ်းခန့်ကာလတစ်ခုခုကို ထည့်သွင်းနိုင်သည်။ သင်၏ အစမ်းခန့်ကာလအတွင်းပင် သင့်အား လုပ်အားခပေးရမည်။
သင်သည် လုပ်ငန်းဝင်သင်တန်း သင်ယူခွင့် ရှိသည်
အလုပ်မိတ်ဆက်သင်ကြားခြင်းဆိုသည်မှာ သင့်အလုပ်နှင့် လုပ်ငန်းခွင် စည်းကမ်းများအကြောင်း သင့်အား သင်ကြားပေးခြင်း ဖြစ်သည်။ တစ်နည်းဆိုရသော် သင်၏ အလုပ်နှင့် လုပ်ငန်းခွင်၊ အလုပ်ခွင်၏ အထွေထွေ ညွှန်ကြားချက်များ၊ စက်ယန္တရားများနှင့် ကိရိယာများ အသုံးပြုမှု၊ ဘေးကင်းသော အလုပ်လုပ်ကိုင်ရေး နည်းလမ်းများနှင့် သင့်အလုပ်၏ စွန့်စားမှုများနှင့် ဘေးအန္တရာယ်များအကြောင်း သင့်အား အသိပေးပါမည်။ သင်၏ လုပ်ငန်းဝင်သင်တန်းကာလအတွက် သင့်အား မဖြစ်မနေ လုပ်အားခပေးရပါမည်။
သင်ဖျားနာပါက အလုပ်မှ ပျက်ကွက်ခွင့်ကို ခံစားရပါသည်
သင်ဖျားနာပါက သင်ပျက်ကွက်ရသည့်အကြောင်းရင်းကို သင့်အလုပ်ရှင် သို့မဟုတ် မန်နေဂျာအား ချက်ချင်းအသိပေးပါ။ သင့်အလုပ်ရှင်က တောင်းဆိုနေပါက ဆရာဝန်လက်မှတ်ယူပြီး ထိုဆေးလက်မှတ်ကို သင့်အလုပ်ရှင်ထံ ပေးပို့ပါ။
သင် ဖျားနာသည့်နေ့သည် သင် အလုပ်ဆင်းရသော နေ့ဖြစ်မည်ဆိုပါက ထိုနေ့အတွက် လစာရသော ဆေးခွင့်ကို သင် ရရှိရပါမည်။ သင် ဆက်တိုက် ဖျားနာနေပြီး အလုပ်မဆင်းနိုင်ပါက၊ သင် ဖျားနာသောနေ့ပြီးနောက် အလုပ်ဆင်းရက် 9 ရက်အထိသည် သင် အလုပ်ဆင်းရမည့်နေ့များဖြစ်မည်ဆိုပါက လုပ်ခလစာကို ဥပဒေအရ ခံစားခွင့် ရှိပါသည်။ သင်သည် အနည်းဆုံး 1 လကြာ အလုပ်တစ်ခုတည်းတွင် လုပ်ကိုင်ခဲ့ပါက သင်၏ ပုံမှန်လစာအပြည့်အတိုင်း သင် လုပ်အားခ ရရှိရပါမည်။ သင်သည် တစ်လအောက် အလုပ်လုပ်ခဲ့ပါက ပုံမှန်လစာ၏ တစ်ဝက် (50%) ကို ရရှိပါမည်။
ဆေးခွင့်နှင့် ပတ်သက်၍ သင့်လုပ်ငန်းတွင် အခြားပြဋ္ဌာန်းချက်များ ရှိမရှိ သိနိုင်ရန် လုပ်ငန်းနယ်ပယ်၏ စုပေါင်းသဘောတူညီချက်ကိုလည်း စစ်ဆေးပါ။ များသောအားဖြင့် စုပေါင်းသဘောတူညီချက်များက ပိုကောင်းသော စည်းကမ်းချက်များကို ပေးထားသည်၊ သင်သည် ပိုကြာမြင့်သော ကာလအထိ ဖျားနာနေပါက ကိုးရက်ကျော် လစာအပြည့်ရရှိမည်ဟု ဆိုလိုသည်။
အလုပ်အကိုင်ဆိုင်ရာ ကျန်းမာရေးစောင့်ရှောက်မှု
သင့်ကျန်းမာရေးနှင့် အလုပ်လုပ်နိုင်စွမ်းကို သင် ထိန်းသိမ်းစောင့်ရှောက်နိုင်စေရန်အလို့ငှာ အလုပ်အကိုင်ဆိုင်ရာ ကျန်းမာရေးစောင့်ရှောက်မှုကို အလုပ်ရှင်က စီစဉ်ပေးရမည်။ အလုပ်ရှင်အများအပြားသည် သူတို့၏ အလုပ်သမားများထံသို့ ဆေးဘက်ဆိုင်ရာ ဝန်ဆောင်မှုများလည်း ကမ်းလှမ်းပေးသည်။
အလုပ်ရှင်များသည် သင့်အား မတော်တဆထိခိုက်မှုများနှင့် အလုပ်အကိုင်ဆိုင်ရာ ရောဂါများအတွက် အာမခံ ထားပေးရန်လည်း တာဝန်ရှိသည်။ အာမခံသည် ဥပမာအားဖြင့် လုပ်ငန်းခွင်တွင် သို့မဟုတ် အလုပ်သွားအလုပ်ပြန်ချိန်အတွင်း သင် ကြုံတွေ့ခံစားခဲ့ရသော ထိခိုက်ဒဏ်ရာရမှုများအတွက် ကာကွယ်ပေးနိုင်ရာသည်။ သင်သည် အလုပ်ခွင်တွင် မတော်တဆမှုတစ်ခု ဖြစ်ခဲ့ပါက သင့်အလုပ်ရှင် သို့မဟုတ် ကြီးကြပ်ရေးမှူးထံ ချက်ချင်း သတင်းပို့ရန်မှာ အရေးကြီးပါသည်။
ပိုမိုဖတ်ရှုရန်
ပြည်ထဲရေးဝန်ကြိးဌာန၏ Work Help Finland မိုဘိုင်း အပလီကေးရှင်းသည် ဖင်လန်နိုင်ငံသို့ ရောက်လာကြသော နိုင်ငံခြားသား ဝန်ထမ်းများနှင့် ဖင်လန်နိုင်ငံတွင် နေထိုင်နေသူများအတွက် ရည်ရွယ်ပါသည်။ ဤအက်ပ်သည် ဖင်လန်နိုင်ငံရှိ ဝန်ထမ်းတစ်ဦးအဖြစ် သင့် အခွင့်အရေးများနှင့် တာဝန်များအကြောင်း သတင်းအချက်အလက်များကို သင့်ထံသို့ ထုတ်ပေးပါသည်။
အက်ပ်ကို ဒေါင်းလုဒ်လုပ်ပါ (ဖင်လန်၊ အင်္ဂလိပ်၊ အယ်လ်ဘေးနီးယား၊ အာရဗစ်၊ ဘင်္ဂါလီ၊ ဘော့စနီးယား၊ ဒါရီ၊ စပိန်၊ ဖာစီ၊ ဟိန္ဒီ၊ ကဒ်၊ မန်ဒရင်းတရုတ်၊ နီပေါ၊ ပေါ်တူဂီ၊ ပြင်သစ်၊ ရိုမေးနီးယား၊ ဆွီဒင်၊ ဆိုမာလီ၊ ထိုင်း၊ တူရကီ၊ ယူကရိန်း၊ ဥဇဘက်၊ အူရဒူ၊ ရုရှား၊ ဗီယက်နမ်နှင့် အက်စ်တိုးနီးယား ဘာသာစကားများဖြင့်)
InfoFinland သည် ဖင်လန်နိုင်ငံသို့ ပြောင်းရွှေ့ရန် စီစဉ်နေသူ သို့မဟုတ် ဤတွင်နေထိုင်ပြီးသားများအတွက် သတင်းအချက်အလက်ကို ထောက်ပံ့ပေးသည့် ဘာသာစကားပေါင်းစုံ ဝက်ဘ်ဆိုက်တစ်ခုဖြစ်သည်။
InfoFinland (ဖင်လန်၊ ဆွီဒင်၊ အင်္ဂလိပ်၊ ရုရှား၊ အက်စ်တိုးနီးယား၊ ယူကရိန်း၊ ပြင်သစ်၊ စပိန်၊ တူရကီ၊ တရုတ်၊ ဖာစီနှင့် အာရဗစ် ဘာသာစကားများဖြင့်)