तपाईं र तपाईंको रोजगारदाताका अधिकार र जिम्मेवारीहरू – अर्थात तपाईंका रोजगार सर्तहरू – फिनल्याण्डका कानुन र संयुक्त सम्झौताहरूद्वारा नियन्त्रित हुन्छन् । 

फिनल्याण्डमा, विदेशी कर्मचारीहरूसँग फिनीस कर्मचारीहरूका जस्तै अधिकार र जिम्मेवारीहरू हुन्छन् । 

उमेर, जातीयता, राष्ट्रियता, भाषा, धर्म, आस्था, विचार, राजनैतिक क्रियाकलाप, श्रमिक संघ क्रियाकलाप, पारिवारिक सम्बन्धहरू, स्वास्थ्य, अपाङ्गता, लैङ्गिक झुकाव वा कर्मचारीको व्यक्तित्वसँग सम्बन्धित कुनै पनि आधारमा कुनै पनि भेदभाव गर्ने अनुमति दिइने छैन ।

उदाहरणका लागि, तपाईं विदेशी कर्मचारी भएका कारणले तपाईंको भुक्तानी घटाइने छैन । 

लिङ्ग, लैङ्गिक पहिचान वा लैङ्गिक अभिव्यक्तिका आधारमा गरिने भेदभाव पनि निषेधित गरिएको छ ।

श्रमिक संघ र रोजगारदाता महासंघहरूले कर्मचारी र रोजगारदाताहरूका अधिकार र जिम्मेवारीहरू – रोजगारका सर्तहरू निर्णय गर्नका लागि संयुक्त सम्झौताहरूको व्यवस्था गरेका हुन्छन् । यसमा, उदाहरणका लागि, भुक्तानी, बोनस, काम गर्ने समय, बिदा र तालिमको अधिकार समावेश हुन्छन् ।

लगभग हरेक उद्योगसँग संयुक्त सम्झौता हुन्छ । संयुक्त सम्झौता भएका उद्योगहरूमा, उदाहरणका लागि, खुद्रा बिक्री, सरसफाइ र निर्माण समावेश हुन्छन् । तपाईंको रोजगारदाता वा श्रमिक संघबाट तपाईंको उद्योगको संयुक्त सम्झौताको एउटा प्रतिलिपि अनुरोध गर्नुहोस् ।

संयुक्त सम्झौताहरू रोजगार सम्झौताहरू जस्तै होइनन् ।

तपाईलें कुनै रोजगारदाताका लागि काम गर्न सुरु गर्दा, उनीहरूसँग सधैं लिखित रोजगार करार गर्नुहोस् । समस्या परेमा, तपाईंले काम सुरु गर्दा के कुरा सहमतभएको भनी जाँच गर्न करार हेर्न सक्नुहुन्छ ।

रोजगार करारमा, तपाईं निश्चित कार्य गर्न सहमत हुनुहुन्छ र तपाईंको रोजगारदाताले निश्चित क्षतिपूर्ति भुक्तान गर्न र रोजगारका सर्तहरू पालना गर्न सहमत हुन्छ ।

तपाईंको रोजगार करार सधैं लिखित रूपमा गर्नुहोस् । मौखिक करारहरू पनि मान्य हुन्छन् तर यदि तपाईंलाई समस्या भएमा, तपाईंसँग लिखित करार भएको खण्डमा तपाईं के कुरामा सहमत हुनुभएको थियो भन्ने कुरा प्रमाणितसिद्ध गर्न सहज हुन्छ । यदि तपाईंले मौखिक करार गरेको भए तापनि तपाईंको रोजगारदाताले तपाईंलाई रोजगारका सर्ताहरू लिखित रूपमा दिनुपर्छ ।

रोजगार करारका सर्तहरू कम्तीमा पनि संयुक्त सम्झौता जत्तिकै राम्रो हुनुपर्छ ।

हस्ताक्षर गर्नु अघि आफ्नो रोजगार करार ध्यानपूर्वक पढ्नुहोस् । तपाईंले नबुझेको कुनै कुरामा कहिल्यै पनि हस्ताक्षर नगर्नुहोस् । 

बेतलबी कामको अवधिमा तालिम तब मात्र वैध मानिन्छ जब कुनै आधिकारिक शैक्षिक संस्था वा TE सेवाहरू (फिनिश रोजगार कार्यालय) मार्फत प्रदान गरिन्छ । यदि एउटा रोजगारदाताले उपयुक्त उम्मेदवारलाई जाँच गर्न चाहन्छ भने रोजगार करारमा परिक्षणकाल समावेश गर्न सक्छ । तब पनि परीक्षणकालको कर्मचारीलाई भुक्तान गरिनु पर्ने छ ।

अभिमुखीकरण भन्नाले तपाईंलाई तपाईंको काम र कार्यस्थलका नियमहरूका बारेमा पढाउनु हो । तपाईंलाई तपाईंको काम र कार्यस्थलका , कार्यस्थलका सामान्य निर्देशनहरू, मेसिनहरू तथा उपकरणहरूको प्रयोग, सुरक्षित कार्य गर्ने तरिकाहरू र तपाईंको कामका जोखिमहरू र खतराहरूका बारेमा जानकार हुनुपर्छ ।

यदि तपाईं बिरामी हुनुभयो भने, तपाईंको अनुपस्थितिका बारेमा तपाईंको रोजगारदातालाई तुरुन्तै खबर गर्नुहोस् । यदि रोजगारदातालाई आवश्यकता परेमा, प्रमाणपत्रका लागि डाक्टरलाई भेट्नुहोस् र तपाईंको रोजगारदातालाई उक्त प्रमाणपत्र पठाउनुहोस् ।

तपाईंको रोजगारदाताले जब तपाईं बिरामी पर्नुहुन्छ त्यो दिनको भुक्तानी दिनु पर्दछ । यदि तपाईंको बिरामी लम्बियो र तपाईंलाई काम गर्नबाट रोक्छ भने तपाईं थप नौं दिनको भुक्तानीको हकदार हुनुहुन्छ । यदि तपाईंले कम्तीमा एक महिना काम गर्नुभएको छ भने तपाईं पूर्ण भुक्तानीको हकदार हुनुहुन्छ । यदि तपाईंले एक महिनाभन्दा कम काम गर्नुभएको छ भने, तपाईं आधा भुक्तानीको हकदार हुनुहुन्छ ।

बिरामी भुक्तानीका बारेमा अन्य प्रावधानहरू भएमा सो हेर्न उद्योगको संयुक्त सम्झौता पनि जाँच गर्नुहोस् । सामान्यतया, संयुक्त सम्झौताहरूमा तपाईंले थप दिनका लागि पूर्ण भुक्तानी पाउने कुरा उल्लेख भएका राम्रा सर्तहरू हुने छन् । 

तपाईंको स्वास्थ्य र काम गर्ने क्षमता हेर्नमा सहायता गर्नका लागि रोजगारदाताले पेशागत स्वास्थ्य हेरचाहको व्यवस्था गर्नुपर्छ । धेरैजसो रोजगारदाताहरूले आफ्ना कर्मचारीहरूका लागि चिकित्सा सेवाहरू समेत प्रदान गर्दछन् ।

दुर्घटना तथा पेशागत बिमारीहरू विरुद्ध बीमा गराउनु रोजगारदाताको एक कर्तब्य हुन्छ । बीमाले उदाहरणका लागि कार्यस्थलमा वा तपाईंको यात्राका क्रममा लागेका चोटपटक समेट्न सक्दछ ।